Elke vierkante meter tel
Sel: 0783343867

Posts Tagged erdwurms

Dieselfde taal

Dieselfde taal

Ek so ‘n week of twee gelede ‘n interessante ervaring gehad. Twee mense uit Duitsland het hier by ons gastehuis ingeboek en soos ‘n mens maar is, het ek hulle begin uitvra oor wat hulle daar doen en wat hulle hier kom doen het. Groot was my verbasing to Bastian vertel dat hy besig is met ‘n PhD in volhoubare boerdery en dat hy mense help om klein groentetuintjies in klein spasies te bou.

Ons het die volgende paar dae soveel gedagtes uitgeruil en dit het gevoel asof ons mekaar al jare ken. Ek het byvoorbeeld toe ek en vroulief langs die strand sit en vakansie hou so ‘n week of twee gelede, vir haar gesê dat dit nogal vreemd is hoe, kennis oor iets basies soos voedselproduksie en groenteverbou en preservering van kos, in een generasie verlore geraak het. Van ons oupas en oumas tot nou, het ‘n inligtingsuitwissing plaasgevind. Terwyl ek en Bastian gesels het, het hy presies dit vir my gesê is wat in Duitsland besig is om te gebeur. Sy oupa het nog ‘n groentetuin gehad, maar sy pa-hulle nie. Sy oupa hulle het geweet hoe om kos vars te hou sonder yskaste en vrieskaste, sy oupa het geweet hoe om groente te laat groei sonder sintetiese chemiese bemesting en gifstowwe teen plae. Ons moet as’t ware van vooraf leer om volhoubaar kos te kan produseer. Alhoewel hy Duits praat en ek Afrikaans, het ons ook dieselfde taal gepraat.

Dit het my laat wonder in hoe ‘n mate is daar ‘n sosiale bewustheid oor ‘n komende voedselkrisis onder mense aan die opbou. Of is dit bloot dat ek en Bastian aan dieselfde tipe inligting blootgestel is aan weerskante van die aarde? Wat is die impak van sosiale media om soortvan ‘n “wêreldbrein” of “wêreldsenuweestelsel” aan die gang te sit. Of is die “wêreldbrein” of “wêreldsenuweestelsel” daar ongeag of fisiese inligting gedeel word? Of word die bewustheid bloot gedryf deur iemand wat versiende genoeg is om probleme te identifiseer en dan ander daarop te laat let? OP die ou einde deel ons een persoon se visie, lees daarvan in verskillende boeke en deel dit op allerhande maniere met mekaar?

Facebooktwitter

Wat ek by KZN No-Till Konferensie geleer het

Wat ek by KZN No-Till Konferensie geleer het
KZN No-till

Die KZN No-till Club Bewaringslandbou konferensie 2015 is van Dinsdag 1 September tot Donderdag 3 September by Drakensville ATKV oord buite Bergville gehou. Dit was my eerste keer dat ek die konferensie bygewoon het en ek hoop dat ek weer daar kan uitkom. Ek het waarskynlik so ses jaar gelede eers werklik van geenbewerking (“no-till”) gehoor en daarin begin belangstel. Dit was ongelooflik om verlede week daar by die konferensie te kon hoor van boere wat die praktyk al vir meer as twintig jaar toepas. Die gedagte wat my die meeste getref het, is hoe kan dit wees dat sommige boere al vir meer as twintig jaar die voordeel van geen bewerking oes, terwyl ander boere steeds nie daaraan as oplossing dink nie.

‘n Waarskynlike rede hoekom die vlakke van aanvaarding van geenbewerking in Suid-Afrika so laag is, het dalk te doen met die gedagte dat “no-till” nie net ‘n kopsaak is nie, maar ook ‘n hartsaak.  Elke spreker wat by die konferensie opgetree het, het nie net ‘n klomp feite vir kennisname uitgedeel nie, maar elke spreker het met oorgawe en passie gepraat van geenbewerkingspraktyke wat hulle self be-oefen en projekte waarby hulle betrokke is. By die konferensie is een of twee keer genoem dat jy nie ‘n “no-till” boer is omdat jy ‘n “no-till” planter gebruik nie. Jy is eers ‘n “no-till” boer as die feite van jou kop na jou hart begin deurwerk het in ‘n liefde vir grond en die mikro-organismes wat in die grond is. Eers wanneer jy werklik besef wat die waarde van ‘n mikroskopiese grote bakterie of die waarde van ‘n erdwurm is en jy alles in jou vermoë doen om die organismes te beskerm, dan kan jy jouself ‘n “no-till” boer noem. Die boere wat ek daar gehoor praat het, al was dit formeel op die verhoog of privaat in ‘n gesprek, het nie net ‘n liefde vir grond nie, maar hulle het ook ‘n uitgesproke onwrikbare geloof en liefde in God wat die grond geskep het. Ergon Zunckel, voorsitter van KZN No-till Club, se woorde vat dit so saam: “As a believer, I am confident that this is the closest method of crop farming to what God intended at creation” “No-till” boerdery is eerstens ‘n hartsaak en dan ‘n kopsaak.

KZN No-till6

Hoe maak jy die skuif in jou kop en dan na jou hart om geenbewerking in jou boerdery te begin toepas? Solank as wat jy grond beskou as iets wat die plante moet regop hou, solank as wat jy na sommige landbouvoorligters luister wat sê dat grond net ‘n groeimedium is en dat alles wat die plant benodig deur ‘n chemiese korrel toegevoeg kan word, solank sal jy nooit oorskakel tot geenbewerkingspraktyke nie. Eers wanneer jy begin besef dat chemie, organies en biologie saamwerk om ‘n plant te laat groei, dan begin die kopskuif kom en word “no-till” ‘n kopsaak. Wanneer jy dan verder besef dat dit wat jy met grond aanvang en hoe dit wat jy met grond doen die kleinste organisme in die grond beskadig of nadelig be-invloed en jy besef dat jy deur die grond te versteur, dit kaal los en die biodiversiteit van dit wat onder en bo die grond lewe tot niet maak, dan begin “no-till” vir jou ‘n hartssaak word. Jy het eers tot “no-till” aanvaarding gekom as jy dit wat jy besef jy verkeerd doen, wil begin regstel. Vic Roberts het die eerste dag se lesings begin deur te vertel van wat jy alles in ‘n handvol grond gaan raaksien. As jy die dag Vic se passie oor die kleinste organisme in die grond deel, dan kan jy sê dat “no-till” vir jou ook ‘n hartsaak geword het.

O ja, ons het by die konferensie ook geleer van hoe om geenbewerking toe te pas. Ons het planter demonstrasies gesien. Ons het dekgewasproewe van Agricol saad gesien. Ons het ook geleer dat bewaringsboerdery nie net beperk is tot “no-till” planttegnieke nie, maar dat dit ook gaan oor hoe jy natuurlike weiding bestuur. Ons het ook gehoor dat die voordele van bewaringslandboupraktyke nie net tot die boer se tyd en geldbesparing uitloop nie, maar soos die begrip deurgee, gaan bewaringslandbou oor die bewaring van die natuurlike hulpbronne op jou plaas. Deur grond te bewaar, bewaar jy jou en jou nageslag se toekoms.

Planters
Weiding
Facebooktwitter

Agteruit-ge-erdwurmboer

Agteruit-ge-erdwurmboer

Die afgelope paar maande het my erdwurmboerdery agteruitgegaan. Ek bedoel ek het AGTERUIT-GE- ERDWURMBOER! Die rede is bloot omdat ek in ‘n paar tegniese probleme vasgeloop het en omdat ek ook ‘n nuwe gewaarwording gemaak het. Ek het vir soveel van julle belowe dat ek aan die tegniese probleem werk en vandag is 2014 alreeds (amper ) twee weke aan die gang en steeds kry ek nie die probleem opgelos nie. Die tegniese probleem het so drie of vier maande gelede sy kop uitgesteek! Dit is een aspek van die agteruitgang wat my erdwurmboerdery beleef het. Die probleem in kombinasie met die gewaarwording het daartoe bygedrae dat ek so ‘n bietjie afstand van die boerdery gaan soek het. Ek het die bestaande erdwurmkompos gebruik vir my groentetuine en die erdwurms net genoeg kos gegee om nie my hele boerdery tot niet te laat gaan nie.

Die gewaarwording het my egter op nuwe paaie gestuur nadat ek die volgende eendag aan my volgeling op Twitter ge-Tweet het:

“I always thought my #earthworms are working hard to make compost for me. Now I know it’s me working hard to supply them with organic waste.”

Om die “harde werk” in perspektief te stel: Toe ek die gewaarwording ge-Tweet het, het ek ongeveer 4 bakkie vragte beesmis op ‘n dag by ‘n melkstal gaan oplaai! Die oplaai is redelik maklik, maar die mis moes elke keer met die hande afgelaai word. Enige iemand wat al met mis gewerk het, sal weet dat ‘n mens voel dat jy net nie meer daarmee wil aangaan nie.Die enigste uitweg is om te meganiseer, maar dit kos geld. Dit in kort hoekom ek bietjie  AGTERUIT-GE- ERDWURMBOER het.

In die tussentyd het dinge egter nie heeltemal gaan stilstaan nie. My nuwe leuse (en vir baie mense net ‘n cliché) is deesdae “It’s not about the destination, it’s about the journey!” terwyl ek kopkrap oor die mishantering en erdwurmboerdery – en kompostering, het ek my aandag meer op kompostee begin toespits. Die kompostee bied die moontlikheid om op ‘n kleiner skaal erdwurmkompos (of enige ander kompos) te produseer en die gunstige mikrobes in die (erdwurm)kompos in water te vermeerder en op jou tuin of lande toe te dien.

Een van my Twitter volgelinge @Healthy_Soils  (Hendrik Smith van Graan Sa) het toe op die bogaande Tweet ge-antwoord:

“Correct, it is quite energy intensive. I perceive normal compost, mulching or crop diversity as better practices.”

Hendrik kom DV die 21ste Januarie 2014 hier by ons met ‘n groep boere oor bewaringsboerdery gesels en die moontlikheid van ‘n bewaringsboerdery studiegroep het sodoende op die tafel verskyn.

My belangstelling in kompostee en die antwoord op my Tweet, het verder bygedra dat ek meer aandag aan my tuin en landbou grond begin gee het. Nie net my eie grond nie, maar ook my vriende en bure se grond. Ek het al hoe meer vrae begin vra, is ons besig om ons grond af te breek of op te bou? Hoe kan ek my grond gesond kry en hou? Deur na die vrae te kyk het ek besef dat die gewone gronderdwurms (endogeic spesies) wat in ons grond voorkom ‘n belangrike rol speel, eerstens as aanduiders van grond gesondheid en tweedens as handhawers van grondgesondheid.  Ek het lankal reeds deklae (“mulching”) en kompos op my grond begin gebruik en die waarde daarvan besef. Met my nuwe ontdekkings en leeswerk het ek die wetenskap agter die gebruik van deklae en kompos ontdek. Daarmee saam ook hoekom kompostee so ‘n goeie produk is om te gebruik. Watter effek die onderskeie elemente op erdwurms in die grond het.

Met die nuwe kennis oor die rol van endogeic erdwurms in ons grond het ek egter ook begin VOORUIT-ERDWURMBOER, want die erdwurms in my land en tuin het meer geword. Agteruitgang is nie noodwendig ‘n verkeerde ding nie! Die komende jaar gaan ek dus nie net op epigeic erdwurms en die komposteringsprosesse aandag gee nie, ek gaan ook op my endogeic erdwurms konsentreer. Die fokus op beide erdwurmspesies, gaan ook reflekteer op die samestelling van my webblad, waaraan ek tans werk om op datum te bring. Die veranderings behoort binne ‘n week of twee sigbaar te wees!

Dit maak dus nie saak hoe nie, maar erdwurms boer, gaan ek erdwurms boer. Nie net wil ek erdwurms boer nie, ek wil ook nie meer sonder hulle boer nie.

Facebooktwitter